From Angela Mattiacci, Le Bestiaire Marial tiré du Rosarius, Paris ms. B.N. f. fr 12483, page 124-137.

Calandre, Book II, Chapter XVI, Folio 162r-163v

• Caladrius est un oisel
• Qui est et gracieus et bel,
• Partout blanc et n'a point d[e noir];
• No livre dient que c'est voi[r].
• S'aucun es iex a maladie,
• De cest oisel prenés partie,
• C'est la cuisse; ele alegera
• Qui a son droit la parlera[l. portera].
• Caladrion par nuit obscure
• Vole. Il ra une autre nature
• Qui est merveilleuse et bonne:
• Se malade est une personne
• Et bien le regarde en la face,
• Que attentiblement le face,
• Signes est que ne morra mie.
• Et le contraire segnefie
• Mort a venir prochiennement;
• Quant ses iex tourne ysnelement
• Et quant volentiers ne le voit,
• C'est signe que ciz mourir doit.
•  
• Par cest oisel j'entens la dame
• De cui remplie estoit l'ame
• Des graces du Saint Esperit.
• Onques Diex tel fame ne fist.
• Les dons du Saint Esprit ot to[z].
• En li descend [. . . . ]
• Pour adoucir nostre malage.
• Plus qu'autre la fist sainte et sage.
• Bien a l'oisel est comparee
• Pour ce qu'ele est haut eslevee,
• Oisel si s'eslieve en haut.
• A ceste dame rien ne chaut
• De chose qui ou monde soit.
• Chose terrienne ne prisoit,
• Mes tout en grant despit avoit.
• Pour quoy? Li mondes ceus deçoit
• Qui metent leur affections
• En terriennes possessions.
• Marie, le monde ne ses biens
• Ne amoit ne ne prisoit riens;
• En pechié nous font trebuchier,
• Pour ce font petit a prisier.
• Tu, pour quoy le monde tant prises?
• Se bien le quenois et avises,
• Tu le priseras molt petit,
• En osteras ton appetit.
• Li mondes n'est c'une frivole.
• Lesse le donc et en haut vole,
• Si comme fist la bele dame
• Qui de nous ne quiert mes que l'ame,
• Principaument, combien qu'au cors
• Face souvent plurieus confors.
• A l'examplaire de Marie,
• De voler ou ciel t'estudie.
• Et a la terre ne t'aher!
• Noble chose est voler en l'air.
• Aucune fois faut a la terre
• Descendre pour sa vie querre;
• Mes fay i petite demeure,
• Que Sathenas ne te deveure.
• Ainsi le fist dame Marie,
• Ele i avoit molt povre vie.
• Molt est la dame gracieuse,
• Sur toutes autres vertueuse:
• Grace el avoit en bien parler,
• Grace en saintement penser,
• Grace en chastement regarder,
• Grace en tous temps bien ouvrer.
• Et de toy que poons nous dire?
• Mal atrempee est ta lire
• Et si as le cuer rempli d'ire,
• De tes compaignons ies le pire.
• En l'abbaie te ren de Lire
• Et en meileur ta vie mue
• Ainçois que Damedieu te tue.
• Par la mort chascun est tué.
• Eureus est cil qui s'est mué
• En miex, bien puet male turie
• Eschaper et recouvrer vie.
• Ta parole souvent est vainne:
• Il samble que ta langue mainne
• Sathenas, qui les langues ploie
• Et les met hors de sainte voie.
• Male langue fait molt de maus
• En recitant autrui deffaus.
• El nuit souvent a ceus qui l'oient;
• Souvent par l'oïr se desvoient.
• Parole male point n'escoute,
• Mes arriere de toy la boute;
• C'est une bonne bouterie.
• Mal arrier bouter pas n'oublie;
• Arriere le bouta Marie,
• Tant comm vesqui en ceste vie.
• Ton cuer est plain de punaisie,
• De rancune, d'orgueil, d'envie.
• De couvoitise tant i a
• Que cis qui le fist riens n'i a;
• Nequedent le cuer vieut avoir.
• Li sages tesmoigne ce voir
•  
• Proverb' .XXIII. Prebe fili mi cor tuum mihi
• "Biau fix, ton cuer et ta pensee
• En moy, Dieu, soit toute getee."
• S'en autre lieu l'as assenee,
• Ele est souvent triste et troublee.
• "Ton cuer me baille, biau dous fiex",
• Ce dit a chascun Damedieux.
• Tes iex garde que chastes soient:
• S'il ne le sont, il se desvoient;
• Se chastes n'iez en ton regart,
• Entechiez es d'un mauvés dart.
• Hons ou fame de bonne part
• De soy garder tous temps a l'art.
• Ueil est du cuer le message,
• S'il est ou nices ou volage.
• Ne hons ne fame ne sont sage
• Qui ont es deus iex tel malage.
•  
• Aug'. Impudicus oculus impudici
• cordis est nuncius
• "L'ueil non chaste monstre le cuer
• Non chaste". Enten ci, bele suer!
• En ouvrer avoit grant deduit
• Marie, par jour et par nuit.
• Par jour poons des mains ouvrer
• Et par nuit Damedieu ourer,
• Combien c'ouvrer et ourer Dieu
• Par jour, par nuit, en tout lieu,
• Puisse et pecheur et preudomme,
• Neïs en peditant a Romme,
• Si com Hardingus le faisoit,
• Tous les jours un psautier disoit
• A la grant Romme que qu'aloit,
• Por nul travail ne le laissoit.
• Lonc fu son pelerinage,
• Quar de region fu sauvage.
•  
• Blancheur purté senefie;
• Partout fu en dame Marie.
• Rien de noir ne fu en la dame,
• Blanche fu et de cors et d'ame.
• Pechié fait homme et fame noir;
• De lui fuir fai ton devoir.
• Qui bien pechié quenoisteroit,
• Point en lui ne s'embateroit.
• Pour ce que ne le connoissons,
• Point a pechier nous ne laissons.
• Je, se pechié bien cognoissoie,
• Tantost a pechier je lairoie.
• Du tout je ne le cognois mie;
• Pour ce m'abandonne a folie.
• Pechiez engenre tous les maus;
• Il fait cors et ames mesiaus;
• A mainte gent confusion
• A fait et grant affliction.
• A l'infernal dampnacion
• Mainne, ou n'a redempcion.
• Pechié tout en cest monde ho[nneur]
• Et fait encourre deshonneur.
• Pechié ne plait grain a preud[omme];
• Et de tant qu'est plus grant la [somme],
• De tant la personne vaut main[s].
• Hons ou regne pechié est vai[ns].
• Pechié devant Dieu homme nai[n]
• Fait; n'est digne de mengier p[ain].
• Pechié fait maise la personne
• Qui devant estoit bele et bonn[e].
• Neïs les menbres naturez
• Par pechié sont deffigurez.
• Nostre honteuse nature
• Par pechié enqueurt grant lai[dure].
• Pechié fist angres trebuchie[r],
• A Adam paradis widier;
• Dame Eve n'i demoura mie,
• Ce li avint pour sa folie.
• Pechié toute personne ahonte,
• Pechié du ciel oste la monte.
• De pechier as plurieurs ne ch[aut],
• Pour ce ne pueent monter hau[t].
• Pechié n'a nul preudomme chie[r],
• Quar en enfer fait trebuchier.
• Pechié tout le monde bettour[ne];
• Quiconques peche, mal tour tour[ne].
• Le monde est tout bettourné.
• Pour quoy? A pechié s'est tour[né].
• Ici a male tournerie
• Quant par pechié on pert la vie
• Et d'ame souvent et de cors.
• Qui gros pechié fait, il est mors.
• Li aucun ont tourné le dos
• A Dieu, pour ce les tien pour sos.
• Bonne n'est pas ceste manier[e],
• Le dos tourner a la lumiere;
• C'est signes que ne l'aimment mi[e],
• Quant a Dieu font tel tournerie.
•  
• Jh'e .II. Verterunt ad me terg[a]
• et non faciem.
• Le dos me tournent li merdier,
• Veoir ma face n'ont pas chier.
• Un temps venra que leur rendrai
• Et que le dos leur tourneray;
• Pechier leur sera chier vendu,
• En enfer leur sera rendu.
• Pechié regne entre seculers,
• Entre moignes et regulers.
• Uns dit que prescheur et meneur
• Entre les mais sont mains poieur.
• Je ne voy hui nului parfait:
• Tuit mesprennent en dit ou en fait,
• En pens ou en consentement.
• Bien le verront a jugement;
• Bien pourront dire "A tart! A tart!"
• Quenois ta folie, musart!
• Pendu seront a male hart,
• Ou feu d'enfer qui adez art.
• Fui pechié de tout ton courage,
• Que ne desserves tele rage
• Ou brulé sont li enragié
• Qui en cest monde ont fait pechié.
• Fui pechié de tout ton povoir;
• Non miex, mes pis en pues valoir.
• La mere au segnor de gloire
• Onques par pechié ne fu noire.
• Blanc donc soions par sainte vie
• Si comme fu dame Marie.
•  
• Se homme ou fame a mal es iex,
• Ou obscurcis ou chacieus
• Soient iex de cuer ou de cors,
• La tenebrosité met hors,
• Les esclarcist et renouvele
• La glorieuse pucele.
• Par li ont maint clarté receue
• Qui devant l'avoient perdue.
• Et qu'est ore voler de nuit?
• C'est de pechié fuir deduit.
• Ceste nuit transvola Marie,
• Grain ne pecha toute sa vie.
• Tu la nuit de pechié transvoles,
• Ne en ton cuer point ne l'acoles;
• C'est une male acolerie.
• [. . . . . . ] la vie
• Si fait li cors souventes fois
• En clers, en lais, en dus, en rois.
• En faisant la sote besoigne
• Fu ocis .i. dux de Bourgoigne.
• N'escoute a l'uis de ton voisin;
• Il n'i a point de biau cousin.
• Soy jouer a fame estrange,
• Li maris mesmes si s'en venge,
• Se il le trueve en fait present;
• Adonc cis sa folie sent.
• Pechié de cors et d'ame est mort
• Et arriver fait a dur port.
• Je vous pri, pucele Marie,
• De toute fole acolerie
• Garder veulliez mon cors et m'ame,
• Et de tout nuisable diffame.
• Molt est ceste dame piteuse
• Et de nostre salut soigneuse.
• Se de ses iex dous nous regarde,
• De mort des ames n'avons garde.
• Se de nous regarder n'a cure,
• Preste nous est mal'aventure.
• Saint Anciaus dit, et est vrité,
• Que chose est de necessité
• Que tout aussi quant com Marie
• Le pecheur ne regarde mie,
• Mes de lui sa face avertit
• N'a li point ne se convertit,
• Il faut qu'il muire selonc l'ame,
• Aussi se ceste bonne dame
• Nous resgarde par sa douceur,
• Il n'i a nul tant soit pecheur
• Qui perir puit. Je le te prueve
• Par un example qu'escrit trueuve
• Ou Livre des Dons, d'un enffant
• Qui n'estoit pas encor molt grant,
• Le quel sauva dame Marie;
• De mer fu en peril sa vie.